ಮನಸ್ಸೇ ಎನ್ನ  ಮನ್ನಿಸು
ಸೃಷ್ಟಿಯ ವಿಸ್ತಾರ ನೀನು

ದೇಹದ ಸೀಮಿತ ನಾನು

ನನ್ನ ನಿನ್ನ  ನಂಟೇನು ?

ಮಂದಸ್ಮಿತೆಯೆ , ಮನೋಜ್ಯೋತಿಯೇ
ಅಕ್ಕರೆಯಿಂದ ಕರವ ಹಿಡಿದವಳೆ
ಕಾವ್ಯಾಮ್ರುತವ ಹರಿಸುವವಳೆ
ನಿನಗಿರಲಿ ನನ್ನ ಭಕ್ತಿಯ ಕಟ್ಟಳೆ .

ಸಾಕು ಸಾಕೆನಗೆ 

ತೀರದ ಈ ಹಂಚಿಕೆ 

ಬೇಕು ಬೇಕೆನಗೆ 

ಸಾವಿಲ್ಲದ ಸಂಚಿಕೆ .

ಹೃದಯ ಮಂದಿರಕೆ ದಾರಿ ಯಾವುದು?
ಅದರ ಕದದ ಕೀಲಿ ಯಾವುದು?
ಅದ ಬೆಳಗುವ ಜ್ಯೋತಿ ಯಾವುದು?
ನಿನ್ನ ಕೃಪೆಯಿಲ್ಲದೆ , ಏನೂ ಕಾಣದು.

ತರತರ ಗೀಳಿನ ಬಾಳು 

ಹೊಸಹೊಸ  ಗೀಳಿನ ಗೋಳು 

ಬೀಳದೆ ಬಲೆಗೆ ಸ್ವಲ್ಪ ತಾಳು 

ಗೀಳು ಗೋಳಿಲ್ಲದ ಜೀವನ ಬಾಳು 

ಗತಿಸುವ ಜೀವಗಳು 

ಘಾತಿಸುವ ಸೆಳೆತಗಳು 

ಗಮನವದರಲೆ ನಿಂತಿರಲು 

ತೆರೆವುದೆ ಮುಕ್ತಿಯ ಬಾಗಿಲು?

ಕುಸುಮದ ಗಂಧವರಡಲು ಗಾಳಿ ಬೇಕು
ಪಕ್ಷಿಯ ಗೂಡಿಗೆ ಮರ ಬೇಕು
ಭೂಮಿಯ ಚಲನೆಗೆ ಸೂರ್ಯನಿರ ಬೇಕು
ಎನಗೆ ನಿನ್ನಯ ರಕ್ಷೆ ಬೇಕೇ ಬೇಕು  

ಒಣ ವ್ರತಹೋಮ
ಬತ್ತಿದ ಬಾವಿಗೆ ಸಮ
ಭಕ್ತಿಯ ಭಗವ್ನಾಮ
ನೂರು ಯಾಗಕೆ ಸಮ   

ವಿಚಾರವಿಲ್ಲದ ಆಚಾರ
ಮುಳ್ಳಿಲ್ಲದ ಗಡಿಯಾರ
ವಿಚಾರವಂತರ ಆಚಾರ
ಸುಲಲಿತ ಜೀವನ ವ್ಯವಹಾರ  
 

ಬುದುಕಾದಾಗ ಸರಳ
ಸೇವೆಯಾದಾಗ ಸಂಬಳ 
ನ೦ಬಿಕೆಯಾಗದಾಗ  ವಿರಳ

ಕಳೆವುದಾಗ ಕರ್ಮದ ಉಪಟಳ

ತಿಳಿಯಾದ ಕೊಳ
ತಿಳಿದಷ್ಟು ಆಳ
ನಿಂತಾಗ ನಿನ್ನ ತಳಮಳ
ತೇಲುವ ಪರಿ ಬಲು ಸರಳ  

ಹೊಳೆಯುವ ಮುತ್ತು
ಕದಿಯಲಾರದ ಸೊತ್ತು
ಕೇಳಿದಾಗ ಗಮ್ಮತ್ತು
ನಮಪ್ಪನ ವಿದ್ವತು 

ಉಸಿರಿಗೆ ಬೆರೆತ ನಿನ್ನ್ಹೆಸರು
ಉಸಿರಿರುವರೆಗು ಹಸಿರು
ಕಣ್ಗಳಲಿ ಬೆರೆತ ಕಣ್ಣು
ನಾನಗುವವರೆಗೂ ಹಣ್ಣು

ಕೆಂಡವೇ? ಕೋಮಲವೇ?
ಬಿಸಿಯುಸಿರೆ ? ನಿಟ್ಟುಸಿರೇ?
ಶೀತಲವೇ? ಅಗ್ನಿ ಜ್ವಾಲೆಯೇ?
ಬಯಕೆಯೇ? ಬದುಕಿನ ಆಸರೆಯೇ ?

ನಲ್ಮೆಯ ನಿನ್ನೀನೋಟ
ಮನ ಕದಡಿದ ಮಾಟ
ಅಹುದೇ ಇವೆಲ್ಲ ದಿಟ ?
ಇಲ್ಲ ಬರೀ  ಎನ್ನ ಮನದ ಆಟ ?
 

   

ಬರಬರ ಬಳುಕಿ
ತರತರ ತಳುಕಿ
ಹೊರಧರ್ರ್ಮವ ಹೊಸಕಿ
ಒಳಧನಿಯ ಹಿಸುಕಿ
ಸುಗಂಧ ಸೌಧ ಕಟ್ಟಿದರೆ
ಒಳನಾತ ಒರಬಾರದೆ?   

ಇರುಳ ನಡೆಗೆ ಬೆಳಕಾಗು ನೀ
ಕರುಳ ಉರಿಗೆ ತಂಪಾಗು ನೀ
ಮರುಳ ಮತಿಯ ಮರೆಮಾಡು ನೀ
ಮಂಗಳ ಮನದಿ ಮನೆಮಾಡು ನೀ 

ಚಿತ್ತವಾಗಲಿ ಚಿತ್ತಾರ
ಸತ್ಯದೊಚನೆಯೇ ಅದರ ಶೃಂಗಾರ
ಮಿಥ್ಯಾಲಾಪ ತರುವ ವಿಕಾರ
ಸತ್ಚಿತ್ತವಲ್ಲವೇ ನಿನ್ನ ಸಾಕಾರ

ಗುಣಾವಗುಣಗಳ ಮಣಮಣ
ಜೀವನ ಲೆಕ್ಕದಲ್ಲಿ ಇದ್ಯಾವ ತೃಣ
ತಾಮಸ ಕರಗಿ, ನಲ್ಮೆಯಾದಾಗ ನಿಜಗುಣ
ಅನುದಿನವು ಸಂತಸದ ದಿಬ್ಬಣ
 

ಜೋಡಣೆಯ ನಂಟು
ತಂಟೆ ತಕರಾರಿನ ನಂಟು
ಗುಪ್ತವಾಗಿರುವ ಗಂಟು
ಉಳಿದ ಮಾತು ನೂರೆಂಟು 
 

ಆಸೆಯ ಅಮಲು
ಅರಳುವ ಮೊದಲು
ತುಮುಲವೆ ತುಂಬಿರಲು
ಬರೆದಿಹೆ ಈ ಸಾಲು.

ನಿನ್ನೊಲುಮೆ ಎನಗಿಯ್ಯಲು
ಸರಸದ ಜೀವನಕೆ ಜೊತೆಯಾಗಲು
ಬರುವೆಯೆಂದು ನೀ ನನ್ನ ಸೇರಲು? 

ಅಲೆಯಲಿ ಬೆರೆತ ಅಲೆ
ನೆನಪುಗಳ ಸರಮಾಲೆ
ಮನವಾಗಿದೆ ಆಸೆ ನಿರಾಸೆಗಳ ಉಯ್ಯಾಲೆ
ಬಂದೊಲಿಯುವೆ ನೀನೆಂದು ಬಾಲೆ ?