ಮನಸ್ಸೇ ಎನ್ನ  ಮನ್ನಿಸು
ಸೃಷ್ಟಿಯ ವಿಸ್ತಾರ ನೀನು

ದೇಹದ ಸೀಮಿತ ನಾನು

ನನ್ನ ನಿನ್ನ  ನಂಟೇನು ?

ಮಂದಸ್ಮಿತೆಯೆ , ಮನೋಜ್ಯೋತಿಯೇ
ಅಕ್ಕರೆಯಿಂದ ಕರವ ಹಿಡಿದವಳೆ
ಕಾವ್ಯಾಮ್ರುತವ ಹರಿಸುವವಳೆ
ನಿನಗಿರಲಿ ನನ್ನ ಭಕ್ತಿಯ ಕಟ್ಟಳೆ .

ಸಾಕು ಸಾಕೆನಗೆ 

ತೀರದ ಈ ಹಂಚಿಕೆ 

ಬೇಕು ಬೇಕೆನಗೆ 

ಸಾವಿಲ್ಲದ ಸಂಚಿಕೆ .

ಹೃದಯ ಮಂದಿರಕೆ ದಾರಿ ಯಾವುದು?
ಅದರ ಕದದ ಕೀಲಿ ಯಾವುದು?
ಅದ ಬೆಳಗುವ ಜ್ಯೋತಿ ಯಾವುದು?
ನಿನ್ನ ಕೃಪೆಯಿಲ್ಲದೆ , ಏನೂ ಕಾಣದು.

ತರತರ ಗೀಳಿನ ಬಾಳು 

ಹೊಸಹೊಸ  ಗೀಳಿನ ಗೋಳು 

ಬೀಳದೆ ಬಲೆಗೆ ಸ್ವಲ್ಪ ತಾಳು 

ಗೀಳು ಗೋಳಿಲ್ಲದ ಜೀವನ ಬಾಳು 

ಗತಿಸುವ ಜೀವಗಳು 

ಘಾತಿಸುವ ಸೆಳೆತಗಳು 

ಗಮನವದರಲೆ ನಿಂತಿರಲು 

ತೆರೆವುದೆ ಮುಕ್ತಿಯ ಬಾಗಿಲು?

ಕುಸುಮದ ಗಂಧವರಡಲು ಗಾಳಿ ಬೇಕು
ಪಕ್ಷಿಯ ಗೂಡಿಗೆ ಮರ ಬೇಕು
ಭೂಮಿಯ ಚಲನೆಗೆ ಸೂರ್ಯನಿರ ಬೇಕು
ಎನಗೆ ನಿನ್ನಯ ರಕ್ಷೆ ಬೇಕೇ ಬೇಕು